ރަށުގެ ތަޢާރަފް

މާއުނގޫދޫ އަކީ މިލަދުންމަޑުލު އުތުރުބުރީގެ އެންމެ ދެކުނުން އޮންނަ މީހުން ދިރިއުޅޭ ރަށެވެ. ރަށުގެ ރައްޔިތުން ދިރިއުޅުމަށް ކޮށްއުޅޭ މައިގަނޑު މަސައްކަތަކީ ރިސޯޓްތަކުގައި ވަޒީފާ އަދާކުރުމާއި މަސްވެރިކަން ކުރުމެވެ. ބިމުގެ ތަނަވަސްކަން ކުޑަނަމަވެސް ދަނޑުބިން ދޫކޮށްގެންނާއި، ގޯތިތެރޭ ދަނޑުވެރިކަން ކޮއްގެން ރަނގަޅު އާމްދަނީއެއް ރަށަށް ލިބެއެވެ. އަންހެންވެރިން ކޮށްއުޅޭ މަސައްކަތްތަކުގެ ތެރޭގައި ރޯނުވެށުމާއި ފަންގެވިނުން ފާހަގަކޮށްލެވެއެވެ. މި ރަށަކީ ގުދުރަތީ ފަޅެއް އެއްވެސް ފަރާތަކުން ނެތް ގާމަތީ ރަށެކެވެ. އޮޑިދޯނިފަހަރު ގެންގުޅުމަށާއި މުދާއަރުވާ ބޭލުމަށް އަދި ލަފާފުރުމަށް ރަށުގެ ދެކުނު ފަރާތުގައި 550 ފޫޓް × 150 ފޫޓްގެ ބަނދަރެއް ސަރުކާރުން ހަދައިދެއްވާފައިވެއެވެ. އަދި މިހާރު ރަށުގެ ހުޅަނގު ފަރާތުގައި 800 ފޫޓް × 250 ފޫޓުގެ ޒަމާނީ ބަނދަރެއް ހެދުމުގެ މަސައްކަތް ކުރެވެމުންދެއެވެ.